د کانونو او پټرولیم وزارت د کانونو او هایدروکاربن (نفت او ګازو) په برخه کې د جامع معلوماتو د ودې او خوندیتوب په موخه منظم الکترونیکي سیستم یا د معلوماتو د مدیریت سیسټم جوړوي.
دکانونو او پټرولیم وزارت سرپرست محمد هارون چخانسوري د ویډیو کنفرانس له لارې د نړیوال بانک د تطبیق او ملاتړ له کاري ټیم سره د هایدروکاربن (نفت او ګازو) په پروژو او ددې سکټور د پرمختګ په موخه لومړۍ کاري غونډه ترسره کړه.
په پیل کې د نفتو او ګازو د پروژو د مدیریت لپاره په تدارکاتي پروسو بحث ترسره شو او پریکړه وشوه چې د نفتو او ګازو د پروژو د ټولو تدارکاتي پروسو د مخته وړلو په موخه دې مشخص مهالوېش جوړ شي ترڅو مسئولیتونه او مکلفیتونه په سمه توګه واضح او د نفتو او ګازو پروژو په برخه کې پرمختګونه او اساسي تحرک رامنځته شي.
په غونډه کې د پايپ لاین د پروژې د مدیریت لپاره د مدیریتي شرکت د استخدام او لومړیتوبونو سربیره د نفتو او ګازو د سکتور د ظرفیت لوړولو او د مدیریت په اړه هم بحث ترسره شو.
دکانونو او پټرولیم وزارت سرپرست محمد هارون چخانسوري وویل "مونږ به د کانونو او هایدروکاربن په برخه کې د معلوماتو د ودې او خوندیتوب په موخه منظم الکترونیکي سیستم یا د معلوماتو د مدیریت سیستم جوړ کړو ترڅو د معلوماتو طبقه بندۍ او له دې معلوماتو څخه ګټه اخیستنې ته موثره زمینه برابره شي."
دغونډې په پای کې د افغانستان له لوري د استخراجې صنایعو د شفافیت نوښت سازمان یا EITI کې دافغانستان له لوري په پرمختګونو خبرې وشوې؛ تمه ده چې ژر به افغانستان خپل عضویت په یاد سازمان کې له ځنډ څخه وباسي.
