د پالیسۍ او برنامو مرستیال د قزاقستان د ترانسپورټ وزارت له سلاکار سره وکتل
د کانونو او پټرولیم وزارت د پالیسۍ او برنامو مرستیال شیخ الحدیث مولوي عبدالرحمن قانت د چهارشنبې په ورځ د ۱۴۰۴ لمریز کال د وږي میاشتې په ۱۹نېټه د قزاقستان د ترانسپورټ وزارت له سلاکار او د یاد هېواد د رېل پټلۍ شرکت له مرستیال سره په خپل کاري دفتر کې وکتل په دې لیدنه کې دواړو لورو پر بېلابېلو موضوعاتو په ځانګړې توګه د دواړوهېوادونو ترمنځ د اړیکو پر ښه والي باندې بحث او نظرونه شریک کړل.
د پالیسۍ او برنامو مرستیال راغلو مېلمنو ته ښه راغلاست ووایه او د هغوی شتون یې د دواړو هېوادونو ترمنځ د اقتصادي اړیکو د پراختیا او پیاوړتیا لامل وباله او دغه راز یې د هېواد پر کاني سرچینو هم خبرې وکړې.
د قزاقستان د ترانسپورټ وزارت سلاکار د وزارت د رهبرۍ له مېلمه پالنې مننه وکړه او د افغانستان د کانونو په برخه کې یې د پانګونې په موخه خپله لېوالتیا څرګنده کړه.
د پالیسۍ او برنامو مرستیال د هغوی د لېوالتیا هر کلی وکړ او د کان کیندنې د قانون او کړنلارې اړوند یې ورسره د همکاريو ژمنه وکړه.
