د قشقري د نفتوعواید به د سلطان ابراهیم د برېښنا بند، د روغتون او د سرپل ولایت د سړکونو د جوړولو په برخه کې و لګول شي
د کانونو او پټرولیم وزارت سرپرست شیخ الحدیث شهاب الدین دلاور د سرپل ولایت له والي ښاغلي محمد یعقوب عبدالرحمن اکه سره په کتنه کې د سرپل ولایت د کاني زېرمو د عوایدو د مدیریت په ځانګړي ډول د قشقري د نفتو په اړه یې بحث او نظرونه شریک کړل.
په دغه لیدنه کې دواړو لورو د قشقري د نفتو دعوایدو د لګولو څخه د سرپل ولایت د ودانولو او خلکو ته د ټولنیزو خدمتونو په وړاندې کولو ټینګار وکړ، دغه راز یې د سرپل ولایت د خلکو د ستونزو د هوارولو، د سلطان ابراهیم د برېښنا بند د جوړولو پرڅرنګوالي، د روغتون او سړکونو د جوړولو په اړه خبرې وکړې.
همدا راز د کانونو او پټرولیم وزارت سرپرست د قشقري د (۶۰۰۰۰) شپېته زره ټنو خامو نفتو د پلور اعلان تر څنګ زیاته کړه: تمه ده چې د راتلونکي میلادي کال تر پایه پورې به په قشقري کې د نویو څاګانو پر کیندلو سره د نفتو د استخراج په برخه کې زیاتوالی راشي، چې په دې سره به د عوایدو سطحه هم لوړه شي، چې دغه عواید به د سرپل ولایت د ودانولو په برخه کې مصرف شي.
