د جنګ له تغذیې څخه په پایداره اقتصادي تولید د کانونو بدلول زموږ لمړیتوب دی
د کانونو او پترولیم وزارت کارکوونکو ته د سرپرست او نوماند وزیر په توګه د محمد هارون چخانسوري د معرفي مراسم ترسره شول.
محمد هارون چخانسوري نن له غرمې وروسته د یو لړ مراسمو په ترڅ کې د چارو ادارې د عمومي رئیس ښاغلي ډاکټر فضل محمود فضلي له لوري معرفي شو. په یادو مراسمو کې د بهرنیو چارو سرپرست وزیر ښاغلي محمد حنیف اتمر، د جمهوري ریاست د مقام مشاورینو، لوړرتبه دولتي اراکینو، د بهرنیو چارو او کانونو او پترولیم وزارت کارکوونکو ګډون کړی وو.
یاده ناسته د قرانکریم د آیتونو په تلاوت پیل شوه، وروسته د کانونو او پترولیم وزارت تخنیکي مرستیال عنایتالله مومند ګډونوالو ته د ښه راغلاست ترڅنګ د کانونو او پترولیم سرپرست او نوماند وزیر ښاغلي هارون چخانسوري ته د ټاکنې مبارکي وویله او په چارو کې یې ورته د بریالیتوب هیله وکړه.
وروسته، د چارو ادارې عمومي رئیس ښاغلي فضل محمود فضلي د کانونو او پترولیم وزارت له پخوانی رهبری مننه وکړه او ښاغلي چخانسوري ته یې د وزارت د سرپرست او نوماند وزیر په توګه د ټاکل کیدو مبارکي وویله. هغه له کانونو او پترولیم وزارت سره د چارو ادارې د همکاريو ژمنه بیا تازه کړه.
همداراز، د بهرنیو چارو سرپرستوزیر ښاغلي محمد حنیف اتمر د کانونو او پترولیم د سرپرست او نوماند وزیر په توګه د ښاغلي چخانسوري انتخاب غوره ټاکنه وبلله او د یاد وزارت نوې رهبري یې د هیواد د اقتصادي تولید د دستګاه د پیشرفت ځوانه انرژي یاده کړه.
وروسته د کانونو او پترولیم سرپرست او نوماند وزیر ښاغلي محمد هارون چخانسوري د حکومت د رهبري له اعتماد او باور څخه مننه وکړه او د خپلو کاري لمړیتوبونو په ځانګړې توګه د جنګ له تغذیې څخه په پایداره اقتصادي تولید د کانونو بدلول، او د کانونو په اړه د ولسمشر د لید په اساس چې د هیواد د ښیرازتیا، له موجودو تخنیکي ظرفیتونو څخه ګټه اخیستنه او ساختاري اصلاحاتو په اړه خبرې وکړې.
د کانونو او پترولیم سرپرست او نوماند وزیر د یاد وزارت د کارکوونکو او رهبري د تیرو څو کلونو کړنو په یادولو سره زیاته کړه چې د کانونو د سکتور د لار نقشې د لمړیتوبونو او پدې باور چې د کانونو په سکتور کې د زنجیرهای ارزښتونو څخه په ګټنه کاري پروسې چټکې شي. هغه زیاته کړه چې پدې برخو کې به له هیڅ ډول هڅو ډډه ونکړي.
ښاغلي چخانسوري ژمنه وکړه چې د یو کال په موده کې به د کوچنیو کاني سیمو کیندنې رسمي کړي او له یو تر پینځو راتلونکو کلونو به د لویو او سترو کانونو سیمو په رسمي کولو کې هڅې وکړي.
یاده ناسته د پایدارې پراختیا او کرونا له مهلکې ناروغي څخه د خلاصون په دعا پای ته ورسیده
