د اندونیزیا هېواد پلاوي د کانونو او پټرولیم وزارت له سرپرست سره په کتنه کې د افغانستان د کاني زېرمو په برخه کې د پانګونې لېوالتیا څرګنده کړه
د کانونو او پټرولیم وزارت سرپرست شیخ الحدیث شهاب الدین دلاور د اندونیزیا هېواد د ولسمشر له پخواني مرستیال ښاغلي محمد یوسف کالا او مل پلاوي سره وکتل.
د کانونو او پټرولیم وزارت سرپرست مېلمنو ته د ښه راغلاست ترڅنګ وویل: دواړه هېوادونه ښې اړیکې او مذهبي مشترکات لري او د افغانستان اسلامي امارت غواړي چې له ټولو هېوادونو په ځانګړي ډول له اسلامي هېوادونو سره ګډې همکارۍ او اقتصادي تعامل ته دوام ورکړي د افغانستان د اسلامي امارت په ټول هېواد کې د امنیت تامین او د بهرنیو شرکتونو او پانګوالو د جلب او جذب لپاره مناسب چاپېریال برابر کړی او نړیوال پانګوال کولای شي له دې فرصت څخه په استفادې د افغانستان په کاني زېرمو کې پانګونه وکړي.
د اندونیزیا د ولسمشر پخواني مرستیال د کانونو او پټرولیم وزارت د مشرتابه له میلمه پالنې څخه د مننې ترڅنګ د دواړو هېوادونو ترمنځ د اقتصادي اړیکو پراختیا مهمه وبلله، د کانونو او انرژۍ په برخه کې د پانګونې په موخه خپله لېوالتیا څرګنده کړه.
د کانونو او پټروليم وزارت سرپرست د هېواد د کاني زېرمو په ځانګړې توګه د افغان تاجک، امو دريا، کټواز، هلمند او هرات نفتي حوزو، اوسپنې، سرو زرو، مسو او د هېواد د نورو کانونو په اړه خبرې وکړې ويې ويل: افغانستان د سترو طبیعي او کاني زېرمو ، ځوان کاري ځواک او سرتاسره امنیت په لرلو سره د پانګونې لپاره غوره فرصت دی.
