د افچین کمپنۍ د 2024 مالي کال پلان په اړه د پرزنټېشن له لارې معلومات وړاندې شول 

د کانونو او پټرولیم وزارت سرپرست شیخ الحدیث شهاب الدین دلاور، د یاد وزارت د مرستیالانو، رئیسانو په ګډون د هایدرو کاربنونو عمومي ریاست رئیس انجنیر محمد طارق له لوري د پرزنټېشن له لارې د افچین کمپنۍ د 2024 مالي کال پلان په اړه معلومات وړاندې شول.
په پیل کې د هایدرو کاربنو عمومي رئیس د تېر مالي کال په اړه لنډ معلومات وړاندې کړل، ورپسې یې د 2024 مالي کال دراتلونکو پلانونو، د نويو استخراجي او اكتشافي څاه ګانو كيندل، د نفتو لپاره د زېرمو جوړول، دوه بعدي او درې بعدي سروې کول، د سړکونو جوړول، د نویو تاسیساتو او تعمیراتو جوړول، د نویو وسایلو او وسایطو اخیستل، د انجینرانو او کارکونکو ګمارل او نورو اړوندو موضوعاتو په اړه، چې د راتلونکي کال په بودېجه کې شامل دي هر اړخیز معلومات واورول.
د کانونو او پټرولیم وزارت سرپرست د افچین کمپنۍ د 2024 مالي کال د راپور له اورېدو څخه وروسته یې سپارښتنه وکړه، چې د ډېرو مصارفو مخنیوی دې وشي، قراردادونه دې د آزادې داوطلبۍ له لارې افغان شرکتونو ته ورکړل شي او د امکان په صورت کې دې یواځې افغان انجینران په دندو وګمارل شي.