د افغانستان صنایع استخراجي سکټور د روڼتیا نوښت (AEITI) پنځه څلویښتمه څو اړخیزه ګروپي ناسته ونیول شوه

د افغانستان صنایع استخراجي سکټور د روڼتیا نوښت (AEITI) پنځه څلویښتمه څو اړخیزه ګروپی ناسته د کانونو او پټرولیم وزارت سرپرست ښاغلي عنایت الله مومند، د پالیسیو او برنامو مرستیال، د اړوند څو اړخیز ګروپي غړو لکه: د ماليې وزارت نمایندګانو، د پلټنې (تفتیش) عالي ادارې، خصوصي سکټور او د مدني ټولنو د غړو په ګډون د دې وزارت د کنفرانسونو په تالار کې جوړه شوه.

د ناستې په سرکې، کانونو او پټرولیم وزارت سرپرست او د پالیسیو او برنامو مرستیال د څو اړخیز ګروپ له اړوند غړو؛ چې په هغه کې د AEITI سکرتریت، د کانونو او پټرولیم وزارت ریاستونه، مالیې وزارت او د مربوطه اداراتو له نه ستړي کیدونکو هلو ځلو څخه مننه وکړه او ۲۰۱۹ کال یې د لاسته راوړنو او د افغانستان لپاره د یو ځل بیا غړیتوب له ترلاسه کولو څخه ډک وباله.

په نوموي ناسته کې د افغانستان صنایع استخراجي سکټور د روڼتیا نوښت (AEITI) د شپږم راپور د سمون، د ورکړل شویو قراردادونو د پلټنې( تفتیش)، د ډبروسکارو او افغان ګاز مالي تصدیو د بیلانس، د روڼتیا نوښت تأثیراتو د بیا څارنې، د څو اړخیز ګروپ د حاضری، د ارتباطي ستراتیژۍ، د (AEITI) کلني راپور، د شخړو د حل په میکانیزم، د ۲۰۱۹  او ۲۰۲۰ کالونو د کاري پلانونو او د سکرتریت په تشکیلاتي چارټ اوږد بحث ترسره شو.

 د ناستې په پای کې د اړوند شریکانو د معلوماتو په راټولولو او د افشا په څرنګوالي، د تصدیو په مالي بیلانسونو او د (AEITI)په کاري پرمختګونو بحث او په نظرونو کې یې فعالیتونه د افغانستان په صنایع استخراجي سکټور کې د ډیرو پرمختګونو څخه ډک یاد کړل.

 د یادونې وړ ده چې، افغانستان د ۲۰۱۰ کال راپدېخوا د صنایع استخراجي سکټور د روڼتیا نوښت (EITI)غړیتوب له ځانه سره درلود. تیر کال په جنوری میاشت کې یې غړیتوب له دې امله ځنډول شوی، چې په صنایع استخراجي سکټور کې د روڼتیا نوښت (EITI) معیارات یې په ښه شان نه وو پلي کړي.