د جوزجان ولایت د یتیم تاق سیمې د ګازو دریو څاګانو د کیندنې تړون لاسلیک شو
د کانونو او پټرولیم وزارت سرپرست الحاج ملا هدایت الله بدري، د ۱۴۰۴/۳/۱۰ نېټه د جوزجان ولایت د یتیم تاق سیمې د ګازو د دریو څاګانو د کیندنې تړون د(۸۰۰۰۰۰۰) اته میلیونه امریکايي ډالرو په ارزښت په داسې حال کې چې مالي او اداري مرستیال مولوي حسام الدین صابري، د مقام سلاکار مولوي مطیع الله حقاني او د وزارت تدارکاتو رئیس مولوي میر محمد نبي محمدي ګډون درلوده د ترکي شرکت سفیر سونداج سره لاسلیک کړ.
یاد شوی شرکت به په یو کال کې د دریو څاګانو د کیندنې چارې بشپړه وي، چې د یادو څاګانو د چارو له بشپړېدو وروسته به په یوه شپه او ورځ کې(۱۰۰۰۰۰) سل زره متر مکعب ګاز استخراج شي.
د یادونې وړ ده، چې د یادو څاګانو په کیندلو سره به هېوادوالو ته کاري فرصتونه برابر شي او سربېره پردې به د ګازو له پلوه د خلکو اړتیاوې هم تر يوي اندازې پوره شي.
