د پالیسۍ او برنامو مرستیال له روسي پانګوالو سره وکتل
د کانونو او پټرولیم وزارت د پالیسۍ او برنامو مرستیال شیخ الحدیث مولوي عبدالرحمن قانت د یکشنبې په ورځ د ۱۴۰۴ لمریز کال د ثور په ۱۴مه نېټه، په خپل کاري دفترکې له روسي پانګوالو او د استخراجي شرکتونو له استازو سره وکتل.
په پیل کې یادو پانګوالو د خپلو شرکتونو د کانونو د استخراج او سپړنې فعالیتونو په اړه معلومات وړاندې کړل او ویې ویل: دوی د کانونو د اکتشاف او استخراج په برخه کې ښې وړتیاوې لري، له تېرو دېرشو کلونو راهیسې د عصري ماشینالاتو، انجینرانو او متخصصینو په مرسته د کانونو په استخراج کې بوخت دي. دغه راز هغوی د افغانستان د کانونو په ځانګړي ډول د سرو زرو او زمردو په برخو کې د پانګونې لېوالتیا څرګنده کړه او د همکارۍ غوښتنه یې وکړه.
د پالیسۍ او برنامو مرستیال راغلو مېلمنو ته د ښه راغلاست تر څنګ وویل: د کانونو او پټرولیم وزارت مشرتابه د بهرنیو پانګوالو لپاره د کانونو په برخو کې د پانګونې اسانتیاوې برابرې کړي دي او له هغوی څخه هرکلی کوي. نوموړي همداراز وویل، چې د کانونو تړونونه د نافذه قوانینو او مقرراتو له مخې ترسره کېږي او هغه شرکتونه چې لوړه مالي وړتیا او مسلکي کسان ولري لومړیتوب ورکول کېږي. د وزارت مرستیال هغوی ته د کان کیندنې د قانون له مخې د همکارۍ ډاډ هم ورکړ.
