د کانونو او پټرولیم وزارت مالي او اداري مرستیال له روسي پانګوالو سره وکتل
د کانونو او پټرولیم وزارت مالي او اداري مرستیال مولوي حسام الدین صابري د شنبې په ورځ د ۱۴۰۴/۲/۲۰ نېټه په خپل کاري دفتر کې له روسي پانګوالو سره وکتل.
په دې لیدنه کې یادو پانګوالو د افغانستان د پانګونې فرصتونه مناسب وبلل او د یاد وزارت له لوري یې د هېواد د کانونو په ځانګړې توګه د سرو زرو او مسو په برخه کې د پانګونې په موخه د همکارۍ غوښتنه وکړه. هغوی همداراز د یو معیاري او مجهز لابراتوار د جوړولو او د کارکوونکو د ظرفیت لوړولو په برخه کې د همکارۍ ژمنه وکړه.
مالي او اداري مرستیال د روسي پانګوالو د لېوالتیا هرکلی وکړ او ویې ویل: د افغانستان اسلامي امارت په ټول هېواد کې د امنیت په تامین سره د بهرنیو پانګوالو د را جلبولو ښه زمینه برابره کړې ده او ټول نړیوال پانګوال کولای شي چې د شرطپاڼې له مخې خپل پروپوزلونه د افغانستان د کاني زېرمو په برخه کې د پانګونې په موخه وړاندې کړي.
دغه راز یې په پای کې هغوی ته ډاډ ورکړ چې د کان کیندنې د قانون او کړنلارې له مخې به ور سره همکاري وشي.
