د کانونو او پټرولیم وزارت سرپرست د تېرې ادارې د مخابراتو او معلوماتي ټيکنالوجۍ له وزیر سره وکتل
د کانونو او پټرولیم وزارت سرپرست شیخ الحدیث شهاب الدین دلاور د تېرې ادارې د مخابراتو او معلوماتي ټیکنالوجۍ له وزیر ښاغلي امیرزي سنګین او د تېر حکومت د اساسي قانون پر تطبیق د څار کمېسیون له رییس ګل الرحمن قاضي سره په خپل کاري دفتر کې وکتل.
د وزارت سرپرست ورته د ښه راغلاست ترڅنګ په بېلابېلو موضوعاتو په ځانګړي ډول د افغانستان د اوسني وضعیت او سرتاسري امنیت، په تېرو دوو کلونو کې د اسلامي امارت په لاسته راوړنو، د کانونو او پټرولیم وزارت د کارونو او فعالیتونو په اړه خبرې وکړې زیاته یې کړه: افغانستان زیات شمېرکانونه لري اوهغه فرصتونه چې موږ یې اوس لرو، کولی شو هېواد د اقتصادي پرمختګ او ودې په لور بوځو، نوموړي دغه راز د کانونو د قراردادنو د مس عینک او دویم مس عینک، د هرات د زنده جان، د کندهار د شور اندام او جبل السراج سمنټو د هېواد د نفتو او ګازو د کانونو او د دغه وزارت د نورو قراردادونو چې د پروسس چارې به یې سل په سلو کې په کور دننه ترسره کېږي خبرې وکړې زیاته کړه: افغانستان د ټولو افغانانو ګډ کور دی او د ټولو په راتګ سره به زموږ مسلکي او تجربه لرونکي کادرونه د هېواد په ودانولو کې ونډه واخلي، ترڅو هېوادوالو ته د هوسا ژوند زمینه برابره کړو.
د مخابراتو او معلوماتي ټیکنالوجي پخواني وزیر ښاغلي امیرزي سنګین د کانونو اوپټرولیم وزارت د رهبرۍ له مېلمه پالنې څخه مننه وکړه ویې ویل: په حقیقت کې اسلامي امارت نه یواځې دا چې ثبات او سرتاسري امنیت رامنځته کړی بلکې په افغانستان کې یې د کارموندنې او پانګونې پراختیا په برخه کې هم زمینه برابره کړې ده دغه راز یې د کانونو او پټرولیم وزارت د کارونو، فعالیتونو او لاسته راوړنو ستاینه وکړه.
