د شبرغان _ مزار نللیکې سږکال پلان شوې چارې له وخت مخکې تکمیل شوي

له شبرغان څخه مزار شریف ښار ته د غځېدونکې نلليکې هغه چارې چې د سږکال پلان کې نیول شوې وې له وخت مخکې تکمیل او دراتلونکي کال پنځه سلنه چارې هم پر مخ تللي دي.
دغه نللیکه چې ٩٤،٥ کیلومتره اوږدوالي لري او د شبرغان ګاز مزار شریف ښار ته انتقالوي د کانونو او پټرولیم سرپرست وزیر له خوا یې د ٦٠٩ میلیونه افغانیو په ارزښت د غځېدلو چارې رسما پیل شوې وې، د پلان له مخې سږکال باید ١٦ کیلومتره نللیکه غزول شوې وای چې له نیکه مرغه دغه نللیکه  ١٨،٥ کیلومتره غزول شوې او د کال تر پایه به نوره هم وغزول شي.
په سېمه کې د نللېکې کارکوونکي د مسؤلینو پوره همکاري، د ډاډمن امنیت شتون، او د متخصصو او مخلصو انجینرانو هلې ځلې د دې پرمختګ عمده لاملونه بولي.