له شبرغان څخه مزار شریف ښار ته د ګازو لېږد نل لیکې پرانيسته

له شبرغان څخه تر مزار شریف پورې د ګازو د لېږد نل ليکې پرانيستغونډه نن شنبه 17/4/1402 نېټې تر سره شوه چې پکې د کانونو او پټرولیم وزارت سرپرست شیخ الحدیث شهاب الدین دلاور او ورسره مل پلاوي، د بلخ والي الحاج محمد یوسف وفا، د مالیې وزارت اداري مرستیال مولوي حمدالله زاهد، داقتصادي معاونیت ستر سلاکار حاجي محمد ابراهیم حکمت ګډون کړی وو.

له شبرغان څخه تر مزار شريف ښار پورې د ګازو د لېږد دغه نل ليکه د شاوخوا 94.5 کيلو متره په اوږدوالي سره د افغانستان اسلامي امارت په لګښت نښلول کېږي. چې د کود او برښنا په صنعت، ښيښې جوړولو او د  IPP غضنفر  شرکت  لخوا د برېښنا توليد لپاره کارول کېږي. او په نېږدې راتلونکي کې به د استوګنې کورونو ته وصل او و ویشل شي.

د يادونې وړ ده چې د يادې نل لیکې په غځولو 609 ميليونه افغانۍ لګښت راځي.