د کانونو د وزیرانو شپږمه بین المللي غونډه د ۲۶ هېوادونو د کانونو د وزیرانو او معینانو او نړیوالو نهادونو د استازو په ګډون ترسره شوه
د کانونو د وزیرانو شپږمه بین المللي غونډه چې د استخراجي صنایعو په سکتور د کوېډ - ۱۹ د زیانونو په اړه د بحث او په راتلونکې کې د دا ډول آفتونو پر وړاندې د چمتووالي د تدابیرو په موخه ترتیب شوې وه، د ۲۶ هېوادونو د کانونو او پټرولیم د وزیرانو او معینانو او د نړیوالو نهادونو د استازو په ګډون د ویډیوکنفرانس له لارې ترسره شوه.
د کانونو او پټرولیم وزارت د پالیسۍ او استخراجي برنامو د تسهیل معین محمد عتیق ذکي په خپله وینا کې وویل: د افغانستان د نورو سکتورونو ترڅنګ، د استخراجي صنایعو سکتور هم د کوېډ – ۱۹ له امله ډېر اغېزمن شو او استخراجي برنامې او د ستر او کوچني مقياس د قراردادونو پروسې د اقتصادي ځوړ له امله بطي شوې. خو په دې وروستیو کې، موږ خپلې یو شمېر پروژې اعلان ته وسپارلې، ترڅو په سکتور کې بېرته تحرک ایجاد او خلکو ته د کار فرصتونه مساعد کړو.
محمد عتیق ذکي وویل: کوېډ - ۱۹ موږ ته د ارتباطاتو د تامين او اجراآتو لپاره يوه نوې لاره راوښوده. موږ اوس مهال د ډيجيټل حکومتولۍ په لوري روان يو او اداري تشکيل مو د وزارت د اهدافو، د کانونو د لارې د نقشې او د ورځينيو اړتياو په پام کې نيولو سره عيار کړی دی.
د غونډې په لړ کې، د ۲۶ هېوادونو د استخراجي سکتور وزیرانو، مرستیالانو او د نړیوالو نهادونو استازو هم خبرې وکړې او د استخراجي صنایعو په سکتور د تحرک د بیاځلې تامین لپاره یې خپلې برنامې او تجربې شريکې کړې.
