محمد هارون چخانسوري: د کابینې د مصوبې پربنسټ دې د ښارجوړولو او ځمکو وزارت کې د ټاپي پروژې د استملاک د چارو لپاره ځانګړې برخه ایجاد شي
د کانونو او پټرولیم وزارت سرپرست محمد هارون چخانسوري نن ماسپښین د ښار جوړولو او ځمکو وزارت سرپرست ښاغلي محمود کرزي سره د ټاپي پروژې د مسیر د ځمکو د استملاک، دکانونو او پټرولیم وزارت او د ښارجوړلو او ځمکو وزارت او د ټاپي کمپني لمیټډ (TPCL) شرکت ترمنځ د تفاهم لیک او د پروژې په روان وضعیت خبرې وکړې.
محمد هارون چخانسوري وویل: د ټاپي پروژې د مسیر ولایتونه باید د اقتصادي او اجتماعي پروژو اساسي برخه وګرځي او د ټاپي پروژې د مسیر د ځمکو د استملاک چارې باید ژر تر ژره پیل شي، ترڅو د پروژې د عملي کار پیل کېدو ته زمینه مساعده شي.
د کانونو او پټرولیم وزارت سرپرست د ښارجوړولو او ځمکو وزارت څخه وغوښتل چې د کابینې د مصوبې پربنسټ دې په دغه وزارت کې د ټاپي پروژې د استملاک د چارو لپاره ځانګړې برخه ایجاد شي.
د ښار جوړولو او ځمکو وزارت سرپرست محترم محمود کرزی د ټاپي پروژې تطبیق د حکومت له مهمو لومړیتوبونو څخه وباله او ددې مهمې پروژې د تطبیق لپاره یې د هر راز همکاریو د ژمنې ترڅنګ، خپل ټیم ته لارښوونه وکړه چې د کابینې د مصوبې پر بنسټ دې د ټاپي پروژې د استملاک د چارو لپاره ځانګړې برخه ایجاد کړي.
