د کانونو او پټرولیم وزیر د لوګر له والي سره په کتنه کې د هغه ولایت د کانونو د مدیریت په اړه بحث وکړ
د کانونو او پټرولیم وزیر محمد هارون چخانسوري، نن سهار د لوګر والي عبدالقیوم رحیمي سره په خپل کاري دفتر کې وکتل. په دغه کتنه کې د لوګر ولایت د کانونو د مدیریت، د مس عینک پروژې د ستونزو د حل او د نویو ساحو د سروې په اړه بحث او خبرې وشوې.
محمد هارون چخانسوري وویل: زموږ موخه، د استخراجي صنایعو په سکتور کې د تحرک او شفافیت تامینول دي. له همدې امله، په پلان کې لرو چې د هېواد د نورو ولایتونو ترڅنګ، په لوګر ولایت کې هم د نویو ساحو سروې ترسره کړو ترڅو د کانونو د غوره مدیریت ترڅنګ، د سیمې خلکو ته هم کاري فرصتونه برابر شي.
د کانونو او پټرولیم وزیر د لوګر له والي څخه د کانونو د غوره مدیریت په برخه کې د وزارت له ولایتي واحد سره د همکاریو غوښتنه وکړه.
د لوګر والي عبدالقیوم رحیمي وویل: د لوګر ولایتي اداره د خلکو په ژوند کې د غوره اقتصادي بدلون د رامنځته کولو لپاره، د کانونو او پټرولیم وزارت سره هر ډول همکاریو ته ژمنه ده.
