د کانونو او پټرولیم وزارت مالي او اداري مرستیال د عزیزي ګروپ د دفتر له رئیس سره وکتل

د کانونو او پټرولیم وزارت مالي او اداري مرستیال مولوي حسام الدین صابري د یکشنبې په ورځ د ۱۴۰۴ لمریزکال د زمري میاشتې په ۱۲مه نېټه د وزارت د غونډو په تالار کې د عزیزي ګروپ د دفتر له رئیس عزت الله نیازمند او مل پلاوي سره وکتل.
په دغه لیدنه کې د عزیزي ګروپ پلاوي په هېواد کې د ډبرو سکرو او ګازو څخه د برېښنا د رامنځته کولو په اړه خپل معلومات شریک کړل زیاته یې کړه: چې په هرات، بلخ، بامیان، بغلان، روزګان، پکتیا، کندهار ولایتونو او حیرتانو کې به د ډبرو سکرو څخه ۳۴۰۰ مېګا‌واټه برېښنا د جوړولو او همدارنګه یې د ګازو څخه په هرات، جوزجان او د شمال په نورو ولایتونو کې د ۳۷۰۰ مېګاواټه برېښنا د جوړېدو خبره وکړه او په دې برخه کې یې د کانونو او پټرولیم وزارت له رهبري څخه د اسانتیاوو رامنځته کولو او همکاریو غوښتنه وکړه.
د وزارت مالي او اداري مرستیال یاد پلاوي ته د ښه راغلاست تر څنګ په هېواد کې د ډبرو سکرو او ګازو شته منابعو او ظرفیتونو په اړه لازم معلومات ورکړل او ورسره یی د هر راز همکاریو ډاډ ورکړ.
په پای کې دواړو لورو ژمنه وکړه، چې د ډبرو سکرو او ګازو زېرمو څخه د لیدنې په موخه به ګډ تخنیکي ټیمونه ولایتونو ته استول کېږي.