د کانونو او پټرولیم وزارت سرپرست له مس عینک کان څخه ليدنه وکړه
د کانونو او پټرولیم وزارت سرپرست الحاج ملا هدایت الله بدري لوګر ولایت ته د خپل سفر په ترڅ کې له مس عینک کان څخه لیدنه وکړه
په دغه سفر کې ښاغلي بدري د مس عینک کان روانې چارې په ځانګړي ډول د اکتشاف او یاد کان ته 8,9 کیلومټره په اوږدوالي د غځېدونکي سړک چارې له نژدې وارزولې
همدا راز ښاغلي بدري د مس عینک کان د قراردادي کمپنۍ له مسؤلینو سره په ليدنه کې یاد کان د هېواد ستره شتمني وبلله او ټینګار يې وکړ چې کمپنۍ باید د اکتشاف او سړک جوړونې چارې ژر بشپړې او د استخراج لپاره دې د اړتيا وړ وسایط او مشینري راانتقال او د سل سلنه پروسس لپاره دې زېربناوې او تاسیسات جوړ کړي.
په دغه سفر کې ښاغلي بدري د عینک مسو له دويم کان څخه هم ليدنه وکړه، نوموړي د یاد کان چارې مثبتې وارزولې او د چارو لا ښه سمون په موخه يې د کمپنۍ مسؤلینو ته لازمې سپارښتنې وکړې.
