د کانونو او پټرولیم وزارت سرپرست د هرات له ملي سوداګرو سره ولیدل
د کانونو او پټرولیم وزارت سرپرست وزیر ښاغلي شیخ الحدیث شهاب الدین دلاور هرات ولایت ته د خپل سفر په ترڅ کې د پلان او پالیسي مرستیال شیخ ضیاءالرحمن الاریوبي، د هرات والي او د کانونو رئیس په شتون کې د هرات ولایت له پانګوالو او قراردادیانو سره ولیدل.
سرپرست وزیر په دغه لیدنه کې پانګوال د هیواد ملي شتمني وبلله او ویې ویل: هیواد مو د بیارغونې لپاره د ملي او بهرنیو پانګوالو پانګې، ملي پروژو پلي کولو او ملت مو کاري بوختیا ته زیاته اړتیا لري؛ چې د دې لپاره باید په ګډه کار وکړو.
د هرات ملي پانګوالو ياد ولایت ته د کانونو او پټرولیم وزارت سرپرست په سفر خوښي څرګنده کړه او د هغه پل یې د هرات ولایت لپاره بختور وبللو چې د سیمې په کچه د سترو پروژو پرانسته وشوه. هغوی دا پروژې د ټول هیواد او په ځانګړې توګه د هرات خلکو لپاره ډېرې مهمې وبللې. او همداراز یې د کانونو او کارخونو په برخه کې خپلې ستونزې ورسره شریکې کړې.
د کانونو او پټرولیم سرپرست وزیر د دوی ټولو ستونزې واورېدلې او د د حل په موخه یې ورسره د لازمو همکاریو ژمنه وکړه.
