د کانونو او پټرولیم وزارت سرپرست د تخار له والي سره وکتل
د کانونو او پټرولیم وزارت سرپرست الحاج ملا هدایت الله بدري د یکشنبې په ورځ د 4/6/1403 نېټې د تخار له والي مولانا عبیدالله امین زاده سره په خپل کاري دفتر کې وکتل.
په دې کتنه کې دواړو لورو په بېلابېلو موضوعاتو په ځانګړي ډول د دغه ولایت د مالګې، سمتي سرو زرو او ډبرو سکرو کانونو، د پانګوالو د جلب او جذب، د کاني زېرمو د اغېزمن مدیریت، د کانونو د قاچاق او غیر قانوني استخراج د مخنیوي په اړه یې بحث او خبرې وکړې.
همدا راز امین زاده غوښتنه وکړه، چې د کانونو له عوايدو څخه دې د دغه ولايت يو شمېر ټول ګټې پروژې تمويل شي او د خلکو ستونزې يې هم د کانونو او پټروليم وزارت له مشرتابه سره شريکې کړې.
د کانونو او پټرولیم وزارت سرپرست د تخار والي په راتګ خوښي څرګنده کړه او ډاډ یې ورکړ، چې د کانونو د قانون او طرزالعمل له مخې به د دغه ولایت د خلکو د ستونزو د حل لپاره لازمې کړنې ترسره شي.
