د کانونو او پټرولیم وزارت سرپرست د بیلاس شرکت له مسوولینو سره وکتل
د کانونو او پټرولیم وزارت سرپرست الحاج ملا هدایت الله بدري د سه شنبې په ورځ (20/6/1403) نېټې د بېلاروس هېواد بیلاس شرکت له مسوولینو سره په خپل کاري دفتر کې وکتل.
د شرکت مسوولینو د افغانستان اسلامي امارت لخوا د پانګونې مناسبې زمینې برابرولو له امله خوښي څرګنده کړه او له اسلامي امارت سره یې د کانونو په ګډو پروژو کې د پانګونې او د کاني وسایلو او تجهیزاتو په برخه کې د پروسس د کارخونې او تخنیکي ورکشاپ د جوړولو په برخه کې خپله لېوالتیا څرګنده کړه، دغه راز یې د انجنیرانو د روزنې او ظرفیت لوړولو په موخه د همکاریو ژمنه وکړه.
د کانونو او پټرولیم وزارت سرپرست په افغانستان کې د پانګونې په برخه کې د دوی د لېوالتیا هرکلی وکړ ویې ویل: د کانونو او پټرولیم وزارت چمتو دی، چې د کورنیو او بهرنیو پانګوالو د هڅونې او جلبولو په برخه کې قانوني همکاري او لازمې اسانتیاوې رامنځته کړي.
