د کانونو او پټرولیم وزارت سرپرست د ایران اسماري ګروپ شرکت له مسئول سره ولیدل
د کانونو او پټرولیم وزارت سرپرست شیخ الحدیث شهاب الدین دلاور د ایران اسماري ګروپ شرکت له مسئول ښاغلي مرتضی اصغري او مل پلاوي سره په خپل کاري دفتر کې ولیدل.
په دغه لیدنه کې ښاغلي اصغري د هېواد د اوسني وضعیت او مناسبو فرصتونو په اړه خوښي څرګنده کړه زیاته یې کړه: افغانستان د تېرو کلونو په پرتله په اوسني وخت کې د پانګوالو لپاره غوره هېواد دی، ټول کورني او بهرني پانګوال کولی شي په ډاډه زړه پانګونه وکړي او دا د افغانستان لپاره ښه زیری دی.
د یاد شرکت رئیس په دغه لیدنه د افغانستان د کانونو سربېره د نفتو او ګازو په برخه کې د پانګونې په موخه خپله لېوالتیا څرګنده کړه او د همکاریو غوښتنه یې وکړه.
د کانونو او پټرولیم وزارت سرپرست مېلمنو ته د ښه راغلاست ترڅنګ د دواړو هېوادونو د اړیکو په اړه وویل: ایران او افغانستان د ښه ګاونډیتوب تر څنګ ګډ کلتور او مشترکات لري او همدا راز یې د کانونو په برخه کې یې د پانګونې په موخه د هغوی د لېوالتیا هرکلی وکړ، د هرات د 10 بلاکونو نفتي حوزې چې 23000 کیلومټره مربع مساحت در لودونکې ده د هرات او بادغیس ولایتونو تر منځ موقعیت لري په اړه یې معلومات وړاندې کړل او په دې برخه کې ورسره د هر راز ملاتړ او همکاریو په اړه ټینګار وکړ ویې ویل: الحمدلله د اسلامي امارت په راتګ سره افغانستان د کورنیو او بهرنیو پانګوالو لپاره ښه ځای دی، موږ هڅه کوو چې تر څو د پانګوالو لپاره ښه فرصتونه برابر کړو د ټولو هغو بهرنیو پانګوالو چې د کانونو په برخه کې پانګونه کوي موږ یې هرکلی کوو.
