د کانونو او پټرولیم وزارت سرپرست د اسلامي هېوادونو له علماوو او پانګوالو سره وکتل
د کانونو او پټرولیم وزارت سرپرست الحاج ملا هدایت الله بدري د سه شنبې په ورځ (24/7/1403) نېټې د ترکیې، یمن او اندونیزیا له علماوو او پانګوالو سره په خپل کاري دفتر کې وکتل.
د کانونو او پټرولیم وزارت سرپرست مېلمنو ته ښه راغلاست وویل او د اسلامي امارت د نظام په اړه یې بحث او خبرې وکړې.
د يادو هېوادونو علماوو له سرپرست وزير سره په کتنه کې د هېواد د اوسني حالت په اړه خوښي څرګنده کړه او په تېرو دريو کلونو کې يې د اسلامي امارت د لاسته راوړنو، په ځانګړې توګه د کانونو او پټرولیم وزارت د لاسته راوړنو ستاينه یې وکړه، همدارنګه د هېواد د مرمر او زمردو په کانونو کې یې د پانګونې غوښتنه وکړه.
د کانونو او پټرولیم وزارت سرپرست د دوی د لېوالتیا هرکلی وکړ ویې ویل: د کورنیو او بهرنیو پانګوالو د هڅونې او جذب په برخه کې موږ چمتو یو چې قانوني همکاري وکړو او لازمې اسانتیاوې رامنځته کړو.
