د چینايي کمپنۍ له رئیس سره د کانونو او پټرولیم وزارت سرپرست لیدنه
د کانونو او پټرولیم وزارت سرپرست شیخ الحدیث شهاب الدین دلاور د چین هیواد شن شي تي خو جی تون کمپنۍ له رئیس ښاغلي جانګ جنګ لي او ورسره مل پلاوي سره په خپل کاري دفتر کې ولیدل.
په دغه لیدنه کې د یادې کمپنۍ رئیس د کمپنۍ د تېرو کارونو په اړه معلومات وړاندې کړل او وویل: زموږ کمپنۍ د کانونو د لابراتوارونو، د مس کانونو اکتشاف او د سرب او جست په برخه کې له دېرش کلنې تجربې سره فعالیتونه لري. او د افغانستان د لابراتوارونو او د کانونو د اکتشاف په برخه کې پانګونې ته چمتو یو.
د کانونو او پټرولیم وزارت سرپرست هم په پورتنیو برخو کې د دوی د پلانونو هرکلی وکړ او د پانګونې او همکارۍ په برخه کې اړوندې کمېټې ته لازمې لارښوونې وکړې.
