د معادنو او پترولیم وزیر شیخالحدیث شهابالدین دلاور نن شنبه د ترکیې له سفیر «جهاد ارگینای» سره په کابل کې لیدنه وکړه
په دې ناسته کې د معادنو او پترولیم وزیر د دغه ډول ناستو په هرکلي سره وویل: دا ناستې د افغانستان او ترکیې د خلکو تر منځ اړیکې ټینګوي. نوموړي زیاته کړه: افغانستان ۴۳ کاله جګړه او بحران کې تېر کړي، اوس یې خپلواکي او ملي حاکمیت تر لاسه کړی او د تېر په څېر امنیتي ګواښونو او زورواکۍ ته یې د پای ټکی اېښی دی. تر ۲۰ کاله جکړې وروسته افغانان اوس یو د بل تر څنګ فعالیت کوي. له دې امله هر هېواد چې غواړي په افغانستان کې پانګونه وکړي، د ا.ا.ا یې هرکلی کوي او امنیت یې نیسي.
د معادنو او پترولیم وزارت د سرپرست په وینا ترکیه موږ ته لومړیتوب لري. دغه هېواد پخوا هم د ښوونځیو د زدهکوونکو او افغان محصلینو په برخه کې همکاري کړې ده، چې دا د دوو مسلمانو او دوست هېوادونو تر منځ همکاري ګڼل کېږي.
په دې لیدنه کې د ترکیې سفیر «جهاد ارگینای» له افغانستان سره د ترکیې د پخوانۍ او تاریخي اړیکې یادونه وکړه او ویې ویل: له افغانستان سره د ترکیې اړیکه اوږده او تاریخي مخینه لري. د افغانستان له خلکو سره د ترکیې مرستې د ورورولۍ پر اساس دي او دا هغه څه دي چې هېڅکله له منځه نه ځي. ترکیه په افغانستان کې د سرې میاشتې له لارې له کډوالو او بېځایه شوو سره د همکارۍ تر څنګ نور هېوادونه هم هڅوي چې د افغانستان له خلکو سره مرسته وکړي. هغه زیاته کړه: ترکیه به ژر تر ژره په کابل کې په سفارت پورې اړوندې چارې پیل کړي.
په پای کې د معادنو او پترولیم وزارت سرپرست وویل: افغانستان د معادنو له نظره یو بډای هېواد دی، نو له همدې امله له دوست هېواد ترکیې څخه غواړي چې د معادنو د استخراج په برخه کې پانګونه وکړي. هغه همدارنګه زیاته کړه موږ ټولو هېوادونو ته ډاډ ورکوو چې په افغانستان کې پانګونه وکړي او موږ په ټول هېواد کې د دوی امنیت ټینګوو.
