د ایران د اسلامي جمهوریت له سفیر سره د کانونو او پټرولیم وزارت سرپرست  لیدنه

د کانونو او پټرولیم وزارت سرپرست ښاغلي شیخ الحدیث شهاب الدین دلاور نن سه شنبه د 25/11/1401 نېټې د ایران اسلامي جمهوریت له سفیر ښاغلي داکتر حسن کاظمي قمي او مل پلاوي سره په خپل کاري دفتر کې ولیدل. 
په پیل کښې د کانونو او پټرولیم وزارت سرپرست د ښه راغلاست تر څنګ د دواړو هېوادونو تر منځ د ښه ګاونډیتوب او ښو اړیکو پر اهمیت یې ټینګار وکړ او د اسلامي امارت د کانونو او پټرولیم وزارت د فعالیتونو په اړه لنډې خبرې وکړې. 
په دغه لیدنه کښې د ایران د اسلامي جمهوریت سفیر او ورسره مل  پلاوي په مختلفو برخو کښې په تیره بیا د افغانستان د کانونو په برخه کښې د پانګونې لپاره د خپل چمتووالی څرګند کړ او د دواړو هیوادونو ترمینځ یې د صادراتو او وارداتو د زیاتوالي غوښتنه وکړه.
د ايران سفير دغه راز د دواړو هېوادونو د صادراتو او وارداتو او د پولې د دواړو غاړو د اوسېدونکو لپاره د کار پيدا کولو په مقصد د دواړو هېوادونو په 20 کيلو مټرۍ کښې د ګډ ازاد مرکز د جوړولو غوښته وکړه او د کانونو په برخه کښې یې د داړو هیوادونو د کارپوهانو تجربو شریکولو باندې ټینګار وکړ.