د انرژۍ د سکتور د شریکانو د همغږۍ غونډه ترسره شوه
د کانونو او پټرولیم وزیر محمد هارون چخانسوري، نن ماسپیښین د انرژۍ د سکتور د ادارو/شریکانو د همغږۍ په غونډه کې د ویډیوکنفرانس له لارې ګډون وکړ.
په دې غونډه کې، د جمهوري ریاست د چارو د ادارې د پانګونې د تسهیل د واحد رئیس عطاءالله نصیب، د افغانستان د برېښنا شرکت اجراییه رئیس داود نورزي، د کلیو پراختیا او بیارغاونې وزارت مرستیال پوپل حبیبی، په افغانستان کې د اسیا پرمختیایي بانک رئیس نرندرا سِنګرو، د مالیې وزارت، USAID، GIZ او نړیوال بانک استازو ګډون درلود.
د کانونو او پټرولیم وزیر محمد هارون چخانسوري په خپلو خبرو کې وویل: د کان کیندنې فعالیتونه پایداره انرژۍ ته اړتیا لري. د استخراجي صنایعو په سکتور کې د پڅې ودې یو لامل، د انرژۍ نیشتوالی دی. له همدې امله، د کانونو د سکتور په چارو کې د سرعت لپاره دې اړونده ادارې خپلې پرمختیایي برنامې په هغو ساحو کې چې د کان کیندنې فعالیتونه ترسره کیږي، تطبیق کړي.
محمد هارون چخانسوري همداراز د افغانستان د کاني او نفت او ګازو د منابعو په اړه چې د انرژۍ په تولید کې د خاص موثریت او اهمیت درلودونکي دي، په ځانګړي ډول د بیات د برېښنا د تولید، مزارشریف، ټاپي، طوطي میدان او ډبرو سکارو په اړه هراړخیز مالومات وړاندې کړل.
د غونډې په لړ کې، نورو ګډونوالو هم خپل نظرونه شریک کړل او پرېکړه وشوه چې د انرژۍ په سکتور کې دې د تنظیم او تخنیکي مشورو لپاره د انرژۍ د سکتور د همغږۍ واحد ایجاد شي.
