د استخراجي صنایعو د شفافیت نوښت د سازمان (AEITI) ۴۸مه غونډه ترسره شوه
د کانونو او پټرولیم وزارت سرپرست محمد هارون چخانسوري د استخراجي صنایعو د شفافیت نوښت د سازمان AEITI په ۴۸مه غونډه کې ګډون او وینا وکړه. په دغه غونډه کې د کانونو او پټرولیم وزارت د کارکونکو سربېره، د مالیې وزارت د ګمرکاتو معین، د افغانستان د استخراجي صنایعو د شفافیت نوښت د سازمان غړو، د خصوصي سکتور استازو او د مدني ټولنو غړو ګډون درلود.
د کانونو او پټرولیم وزارت سرپرست محمد هارون چخانسوري په خپله وینا کې وویل: افغانستان وکولی شول د اعتبار د بېرته اخیستلو پروسې د لومړني راپور له مخې چی د EITI دبورډ لخوا د کانونو او پټرولیم وزارت ته لېږدول شوی وو، له ۲۷ مواردو څخه په ۱۹ مواردو کې د رضایت وړ، په ۵ مواردو کی د پام وړ او په ۲ مواردو کی عالي پرمختګ تر لاسه کړي او د افغانستان غړیتوب د ځنډ له حالت څخه راوباسي.
هغه زیاته کړه: نن موږ د کانونو په سکتور کې د شفافیت لپاره سره راټول شوي یو او غواړو شفافیت تامین کړو. ځکه نو د دغه اصل د تامین لپاره د څو اړخیز ګروپ MSG له غړو څخه د ښې همکارۍ غوښتنه کوم.
د غونډې په ترڅ کې د ۷ شمېرې راپور په ابتدایي طرحه، د مدني ټولنې او خصوصي سکتور د انتخاباتو، د ۱۳۹۵ او ۱۳۹۶ کال د قراردادونو په ارقامو کې د تفاوت او د تصدیانو د تفتیش په اړه هراړخیز بحث ترسره او په اړه یې د څو اړخیز ګروپ MSG لخوا لازم تصامیم ونیول شول.
