د کانونو او پټرولیم وزارت نوي مرستیالان معرفي شول
د عالیقدر امیرالمؤمنین(حفظه الله) د حکم پر بنسټ، د کانونو او پټرولیم وزارت مالي او اداري، سروې جیولوجي او تخنیکي مرستیالان د چارو ادارې لوی رئیس ښاغلي شیخ نورالحق انور، د کانونو او پټرولیم وزیر الحاج ملا هدایتالله بدري، د امارتي شرکتونو لوی رئیس مولوي احمد جان بلال او یو شمېر نورو امارتي مشرانو له لوري معرفي شول.
د یاد حکم پر بنسټ، ښاغلی مولوي محمود شاه زاهد، چې تر دې وړاندې یې د امارتي شرکتونو لوی ریاست د پالیسۍ، څارنې او ارزونې د مرستیال په توګه دنده ترسره کوله، د کانونو او پټرولیم وزارت د تخنیکي مرستیال په توګه؛ ښاغلی مولوي عبدالمتین سعید، چې مخکې یې د مالیې وزارت د عوایدو او ګمرکونو د مرستیال په توګه دنده ترسره کوله، د یاد وزارت د سروې او جیولوجي مرستیال په توګه او ښاغلی مولوي اسحق صاحبزاده، چې مخکې یې د ټولګټو وزارت د اوسپنې پټلۍ د مرستیال په توګه دنده ترسره کوله، د کانونو او پټرولیم وزارت د مالي او اداري مرستیال په توګه معرفي شول.
غونډه د قرآن کریم د مبارکو آیتونو په تلاوت سره د کانونو او پټرولیم وزارت د غونډو په تالار کې پیل شوه. په پیل کې د چارو ادارې لوی رئیس ښاغلي شیخالحدیث نورالحق انور په خپلو خبرو کې وویل: د امیرالمؤمنین(حفظه الله) د حکم پر بنسټ، د کانونو او پټرولیم وزارت لپاره درې تنه هغه مرستیالان چې ښه کاري مخینه او تجربه لري، د یاد وزارت د مرستیالانو په توګه وګومارل شول.
نوموړي زیاته کړه چې په اسلامي نظام کې ټولې پرېکړې د اړتیا، بشپړې ارزونې او دقت له مخې، د نظام او ولس د ګټو په پام کې نیولو سره ترسره کېږي.
ورپسې د کانونو او پټرولیم وزیر الحاج ملا هدایتالله بدري د خپلو خبرو پر مهال وویل: نن چې د وزارت نوي مرستیالان د خپلو دندو د ترسره کولو لپاره معرفي کېږي، باور لرو چې دوی به د خپلې پوهې، تجربې، مدیریتي وړتیاوو او مسلکي تخصص پر مټ د وزارت د پرمختګ، د اصلاحاتو د پلي کېدو او د خدمتونو د لا ښه کېدو لپاره په بشپړ تعهد، صداقت او جديت سره هڅې وکړي.
نوموړي زیاته کړه چې د وزارت مشرتابه او ټول کارکوونکي ژمن دي، چې له نویو مرستیالانو سره د همکارۍ، همغږۍ او ګډ کار په فضا کې صادقانه همکاري وکړي.
له ټولو محترمو رئیسانو او د وزارت له کارکوونکو څخه هیله کوم، چې د وزارت د لا زیات پرمختګ لپاره له نویو مرستیالانو سره په همکارۍ، اخلاص او ګډ مسوولیت احساس کار وکړي؛ ځکه د هرې ادارې بریا د ګډ کار، متقابل باور او ګډو هڅو پایله ده.
په پای کې یو ځل بیا د وزارت نویو مرستیالانو ته د زړه له کومې مبارکي وړاندې کوم او د الله سبحانه وتعالی له دربار څخه ورته د لا زیاتې بریا، روغتیا او توفیق دعا کوم. هیله ده چې د خپلو سپېڅلو مسوولیتونو په ترسره کولو کې د هېواد، نظام او د افغانستان د درنو خلکو لپاره د خیر، برکت او پرمختګ سرچینه وګرځي.
ورپسې د کانونو او پټرولیم وزارت د سروې او جیولوجي نوي مرستیال ښاغلي مولوي عبدالمتین سعید، د افغانستان اسلامي امارت له باور او اعتماد څخه د مننې په څرګندولو سره وویل: دنده امتیاز نه، بلکې یو دروند امانت او ستر مسوولیت دی. ان شاءالله ستاسو په همکارۍ او ګډو هڅو به خپلې چارې په غوره ډول ترسره کړو.
دغه راز د کانونو او پټرولیم وزارت نوي تخنیکي مرستیال ښاغلي مولوي محمود شاه زاهد د خپلو خبرو پر مهال وویل: هغه چارې چې د افغانستان اسلامي امارت له لوري ماته سپارل شوې، زما لپاره امتیاز نه، بلکې یو ستر امانت او دروند رسالت دی. له همدې امله به د دې مسوولیت د غوره ترسره کولو لپاره خپله ټوله وړتیا، تجربه او ظرفیت په کار واچوم او د خپلو همکارانو په همغږۍ او ملاتړ به د صادقانه خدمت او ټاکل شویو موخو د تحقق لپاره له هېڅ ډول هڅې او کوښښ څخه درېغ ونه کړم.
غونډه د امارتي شرکتونو د لوی رئیس ښاغلي مولوي احمد جان بلال له لوري د خیر په دعا سره پای ته ورسېده.
