د ټاپي پروژې چارې په چټکتیا سره روانې دي
د ټاپي د ګازو نللیکې پروژې رغنیز کارونه په هرات ولایت کې د پام وړ پرمختګ کړی دی، د معلوماتو پر بنسټ تر دې دمه شاوخوا ۲۵ کیلومټره نللیکه غځول شوې او د پاتې نللیکې د غځولو لپاره ۱۲۰ کیلومټره سیمه نوره هم چمتو شوی ده.
د معلوماتو له مخې، د پروژې سیمې ته نوې نللیکې او تخنیکي تجهیزات د لېږد په حال کې دي، چې دا به د کارونو په چټکتیا کې مهم رول ولوبوي. تمه ده چې د روان میلادي کال تر پایه د هرات اړوند د پروژې ۱۵۳ کیلومټره برخه بشپړه شي.
دغه راز د کانونو او پترولیم وزارت ژمن دی، چې دا پروژه به د ټاکلي مهالوېش سره سم پر مخ ولاړه شي او په بشپړېدو سره به ګټې اخیستنې ته چمتو شي.
ټاپي پروژه چې د سیمې له مهمو اقتصادي پروژو څخه ګڼل کېږي، د انرژۍ د لېږد تر څنګ د اقتصادي ودې او سیمهییزو همکاریو په پیاوړتیا کې هم مهم رول لري.
