د کانونو او پټرولیم وزارت سرپرست د ولایتونو د کانونو له یو شمېر رئیسانو سره وکتل
د کانونو او پټرولیم وزارت سرپرست الحاج ملا هدایت الله بدري د یکشنبې په ورځ د 4/6/1403نېټې د شمال او شمال ختیځو ولایتونو د کانونو رئیسانو سره په خپل کاري دفتر کې وکتل.
په دې ناسته کې یادو رئیسانو د خپلو دندو او لاسته راوړنو په اړه هر اړخیز معلومات وړاندې کړل او همدارنګه یې د خپلو ریاستونو د کارونو د لا ښه والي په موخه خپل نظریات، وړاندیزونه او ستونزې د وزارت له مشرتابه سره شریکې کړې.
د کانونو او پټرولیم وزارت سرپرست د خدمتونو د وړاندې کولو په برخه کې د دوی هڅې وستایلې، په کاري برخه کې یې په لا روڼتیا، د کانونو د قاچاق او غیر قانوني کیندنې مخنیوی، د عوایدو د ضایع کېدو، د ترازو ګانو په پلي کېدو او څارنې سربېره یې د کانونو د قراردادونو او نورو چارو ټینګار وکړ او د ستونزو د حل په موخه یې لازمې لارښوونې وکړې.
