د کان کیندنې په پروژو کې د کابل پولي تخنیک پوهنتون د جیولوجي او کانونو پوهنځۍ د 1401 کال فارغ شویو محصلینو ګمارنه
د کانونو او پټرولیم وزارت له لوري د لومړي ځل لپاره د کابل پولي تخنیک پوهنتون د جیولوجي او کانونو پوهنځۍ د 1401 کال فارغ شوي محصلین د کانونو د کیندنې په برخه کې د خصوصي کمپنیو له لوري په دندو وګمارل شول.
د کانونو او پټرولیم وزارت سرپرست شیخ الحدیث شهاب الدین دلاور په جوړه شوې غونډه کې وویل: دا ډېر د خوښۍ ځای دی چې نن د کانونو د استخراج، اکتشاف او جیولوجي او کانونو په برخه کې ځوانان په دندو ګمارل کېږي، همدارنګه مو د کانونو او پټرولیم وزارت په بېلا بېلو برخو کې ځوانانو ته د کار زمینه برابره کړې ده، چې د هغو له جملې څخه په شمال کې د ډبرو سکرو تصدۍ او مالګې کانونو په برخه کې ګڼ شمېر ځوانان په کار بوخت دي.
د کانونو او پټرولیم وزارت سرپرست د افغانستان د کانې زېرمو په اړه خبرې وکړې زیاته یې کړه: افغانستان خورا زیاتې کاني زېرمې لري لکه: د ډبرو سکاره، سره زر، مس، مالګه او ګڼ شمېر نور کانونه لري، زموږ ټولو دنده ده چې د دغو کاني زېرمو سم مدیریت ترڅنګ باید په رښتنې توګه او اخلاص ملت او هېواد ته کار وکړو او په ځان بسیا شو.
همدا راز د کابل پولي تخنیک پوهنتون رئیس عبدالرشید اقبال خبرې وکړې ویې ویل: دا د ویاړ ځای دی، چې په لومړي ځل په داسې یوې غونډه کې ګډون کوم چې د کانونو او پټرولیم وزارت په همکاري سره د کابل پولي تخنیک پوهنتون انجنیران په دندو ګمارل کېږي، په همدې موخه د کانونو او پټرولیم وزارت له مشر تابه څخه مننه کوم چې محصلینو ته یې د کار زمینه برابره کړه.
د افغان انویسټ شرکت رئیس ښاغلي شیرباز کمین زاده چې د 75 سلنه محصلینو د ګمارنې خبره یې وکړه ویې ویل: خوښ یم چې د ګران هېواد د محصلینو د ګمارنې په غونډه کې ګډون لرم، کمپنۍ باید د هېواد له شته وړتیاوو څخه ګټه پورته کړي او محصلینو ته د فارغت څخه وروسته د عملي کار زمینه برابره کړي او محصلین باید له دغه فرصت څخه ډېره زیاته ګټه پورته کړي.
د یادونې وړ ده د کانونو او پټرولیم وزارت په پام کې لري چې د معاشونو په ورکړې سره د هېواد له ټولو پوهنتونونو څخه د جیولوجي او معادن، تفحص، اکتشاف او استخراج څانګو ټول فارغ شويو محصلینو ته د کار زمینه برابره کړي.
