د کانونو او پټرولیم وزارت سرپرست د اروپايي ټولنې له ځانګړي استازي سره وکتل
د کانونو او پټرولیم سرپرست شیخ الحدیث شهاب الدین دلاور نن د 20/2/1401 نېټه په خپل دفتر کې له ښاغلي توماس نیکولسن او مل پلاوي سره په خپل کاري دفتر کې وکتل.
لومړی شیخ الحدیث شهاب الدین دلاور د اروپايي ټولنې ځانګړي استازي ته د ښه راغلاست ترڅنګ وویل: موږ غواړو د کانونو د استخراج د پراختیا، اقتصادي، سیاسي او ټولنیزو مسایلو په اړه خبرې وکړو. اروپايي ټولنه د افغانستان د خلکو لپاره د اقتصادي، سیاسي او ټولنیزو ستونزو د حل په برخه کې ډېره مهمه ده او موږ هڅه کوو چې د نړۍ له ټولو هېوادونو سره مثبتې اړیکې ولرو او د بېلابېلو مسایلو په اړه خبرې وکړو.
وروسته بیا ښاغلي نیکولسن د کانونو او پټرولیم وزارت له مشرتابه څخه د دوی د مېلمه پالنې څخه مننه وکړه او وویل: څه موده وړاندې مو د کانونو او پټرولیم وزارت له مشرتابه سره خبرې کړې وې او اوس زموږ موقف معلوم ده، څنګه موږ کولی شوو چې له تاسو سره همکاري وکړو؟
او همدارنګه یې زیاته کړه: موږ غواړو چې په یاده ناسته کې پر درېیو مهمو مسایلو خبرې وکړو، چې له هغې جملې څخه د چینايي او ایراني شرکتونو د پانګوالو راجلبول چې باید د کانونو د استخراج له لارې لرغونو اثارو او چاپېریال ته زیان ونه رسوي. دوهم د جلب و جذب کمیسیون له هیواد څخه بهر افغانانو بېرته راستنیدل خپل هیواد ته او دریم د حجاب په اړه د ښځو د محدودیتونوحالت چې نړیوالو غبرګونونو سره مخ شوی دی.
په پای کې د کانونو او پټرولیم وزیر پورتنیو مسایلو ته اشاره وکړه او وویل چې د کانونو اکتشاف او استخراج به د ملي او نړیوالو قوانینو او مقرراتو سره سم ترسره کیږي او د چاپیریال او لرغونو اثارو د له منځه تلو باعث نه کږي. او د کارمندانو د حجاب په اړه یې وویل: حجاب د افغانانو د کلتور او فرهنګ یوه برخه ده، نوموړي پر اروپايي ټولنې او نړيوالې ټولنې غږ وکړ چې د ملګرو ملتونو منشور ته غاړه کېږدي او د افغانانو کلتور او فرهنګ ته دې درناوی وکړي. او همدارنګه د جلب و جذب کمیسیون کوشش کوي چې هغه افغانان له هیواد څخه بهر دي پرته له کومې ويرې دې خپل هیواد ته راستانه شي او له خپلو هیواد والو سره دې یو ځای ژوند وکړي.
