د کانونو او پټرولیم وزارت د رهبري پلاوي غونډه ترسره کړه
د کانونو او پټرولیم وزارت د سرپرست شیخ الحدیث شهاب الدین دلاور په مشرۍ پنجشنبه 14/11/1400 نېته د رهبري پلاوي غونډه د تخنیکي مرستیال الحاج مولوي محمد عیسی آخند، د جیولوجي سروې مرستیال نور الله ستانکزي، د وزارت د بېلابېلو څانګو د رئیسانو او مسوولینو په شتون کې ترسره شوه.
په دې غونډه کې د وزارت د بېلابېلو څانګو د رئیسانو د کړنو د راپور د اورېدو تر څنګ په لاندې مهمو موضوعاتو بحث او خبرې اترې وشوې:
د ۱۴۰۱ کال د تشکیل په تړاو د بشري منابع ریاست د ځینو ستونزو د څېړلو او دغه راز د مس عینکو کان، د ټاپي پروژې، د سرپل ولايت د نفتو استخراج، د غوريان د اوسپنې کان او د غور د مسو کان د بيا کتنې لپاره تخنیکي معين او د جیولوجي سروې د رئیسانو په مشرۍ د دوو کمېټو د جوړولو پرېکړه وشوه.
همدارنګه په دې غونډه کې د ارزونې پرمهال په شته اهدافو، پلانونو او ستراتیژیو خبرې وشوې، چې په پای کې یې مسوولینو ته د اجرااتو د ښه والي، د کار د سرعت او شفافیت په اړه لازمې لارښوونې وکړې.
