د کانونو او پټرولیم وزیر د هرات د سمنټو پروژې د چارو پر چټکتیا ټینګار وکړ

د کانونو او پټرولیم محترم وزارت وزیر هرات ولایت ته د خپل رسمي سفر په ترڅ کې د هرات د سمنټو پروژې له روانو چارو څخه لیدنه وکړه.
په دې لیدنه کې د یادې پروژې مسؤلینو د تطبیقي بهیر، تخنیکي پرمختګونو او تر دې دمه د ترسره شویو فعالیتونو په اړه تفصیلي معلومات وړاندې کړل او د پروژې د راتلونکو پلانونو او پړاوونو په اړه یې وضاحت وکړ.
ښاغلي بدري د معلوماتو له اورېدو وروسته، د یادې مهمې اقتصادې پروژې د چارو پر چټکتیا ټینګار وکړ او اړوندو مسؤلینو ته یې لارښوونه وکړه چې د تړون له ژمنو سره سم کارونه لا ګړندي او پر وخت پر مخ یوسي.
نوموړي دغه راز د هرات د سمنټو پروژه د هېواد له مهمو صنعتي بنسټونو څخه وبلله او ویې ویل، چې د دې پروژې بشپړېدل به د کورني تولید د پیاوړتیا، د وارداتو د کموالي او د سلګونو کاري فرصتونو د رامنځته کېدو لامل شي.
د یادونې وړ ده چې د اسلامي امارت له حاکمیت وروسته کانونو او پټرولیم وزارت د سمنټو په برخه کې د ځان بساینې په موخه د هرات په ګډون په قندهار، لوګر، پروان او جوزجان کې پنځه سترې پروژې لاسلیک کړي .