د کانونو او پټرولیم وزارت ستر سلاکار د TNG شرکت له عمومي رئیس سره وکتل
د کانونو او پټرولیم وزارت د مقام ستر سلاکار مولوي احمدجان په داسې حال کې چې د پټرولیم عمومي رئیس الحاج ملا محمد اسرائیل او د تخنیکي کمېټې غړو یې ملتیا کوله، د ۱۴۰۵ کال د وري میاشتې په ۲۳مه نېټه، د تاتارستان هېواد د T N G شرکت له عمومي رئیس او مل پلاوي سره په مزار شریف ښار کې وکتل.
په پیل کې یې مېلمنو ته ښه راغلاست ووایه او دواړو لورو د هېواد د نفت او ګازو د سرچینو په برخه کې د پانګونې د شته فرصتونو په اړه خبرې وکړې. همدارنګه د هېواد په کچه د امنیت د ټینګښت، په ځانګړې توګه د آمو دریا نفتې حوزې، د انګوت، قشقري او زمردسای سیمو د نفتي سټېشنونو د بیا رغونې په اړه یې بحث او نظرونه شریک کړل. د یاد شرکت له لوري په دې برخه کې یو لنډ معلوماتي پرېزنټېشن هم وړاندې شو. سربېره پر دې هغوی د نفتو په برخه کې د انجنیرانو د وړتیاوو لوړولو په موخه د چمتوالي خبره وکړه.
د یادې ناستې په پای کې د وزارت د مقام ستر سلاکار هم د ګډ کار لپاره خپل چمتووالی څرګند کړ او په دې اړه یې خوښي وښوده.
