د بامیانو ولایت د سرب او جستو تړون لاسلیک شو
د کانونو او پټرولیم وزارت سرپرست الحاج ملاهدایت الله بدري د بامیانو ولایت د یکاولنګ ولسوالۍ د اسپ میدان سیمې د سرب او جستو کان تړون د محمد بلوچ عزیزي د کانونو د استخراج، پروسس او سوداګریز شرکت سره د (۸۳۸۷۵۰۰۰) افغانیو په ارزښت د (۰،۵۳۸۶۸۳) کیلو مټره مربع په مساحت سره د وزارت ستر سلاکار انجنیر وحیدالله حلیمي، د مقام د دفتر عمومي رئیس الحاج معراج محمد معراج او یو شمېر رئیسانو په شتون کې لاسلیک کړ.
د کانونو او پټرولیم وزارت سرپرست د یاد کان په اړه خبرې وکړې ویې ویل: د دې کان تړون به د پنځو کلونو لپاره وي په دې شرط چې دوی د کانونو د اصولو، کړنلارې او مکلفیتونو سره سم کار او فعالیت وکړي نو د ټاکل شوې مودې له بشپړیدو وروسته به د دوهم ځل لپاره نوی شي. دغه راز به د شرکت د ژمنو پراساس پروسس به یې سل سلنه د هېواد دننه ترسره کېږي.
همدارنګه یې د ټولنیزو خدمتونو او نورو موضوعاتو په اړه خبرې وکړې ویې ویل: د دې پروژې په پلي کېدو سره به په مستقیم او غیر مستقیم ډول د هېواد لسګونه ځوانانو ته کاري فرصتونه برابرشي.
