د تخنیکي پلټنې رئیس د قراردادي شرکتونو له استازو سره وکتل
د کانونو او پټرولیم وزارت د کانونو د تخنیکي پلټنې رئیس انجنیر عبداللطیف خالد د کندز، خوست او کابل ولایتونو د کانونو له قراردادي شرکتونو د استازو سربېره یې د ۷۷ ودانیز شرکت استازو سره هم په خپل کاري دفتر کې وکتل.
د کانونو او پټرولیم وزارت د تخنیکي پلټنې ریاست د کلني پلان له مخې، د ۱۴۰۴ لمریز کال په لړ کې د ترسره شوې ارزونې د پایلو د شریکولو په موخه، د کانونو د تخنیکي پلټنې ریاست له لوري قراردادي شرکتونه کابل ته راوبلل شول، څو د مخامخ ناستې له لارې د پلټنې پایلې ورسره شریکې شي او شته نیمګړتیاوې په رسمي ډول ورته وړاندې شي.
د لیدنې په ترڅ کې د یاد ریاست رئیس له لوري، د شرکتونو د ستونزو د یادولو تر څنګ، شرکتونو ته اړینې لارښوونې او سپارښتنې وشوې. شرکتونو هم د خپلو فعالیتونو د سمون ژمنه وکړه او ډاډ یې ورکړ چې د ریاست ټولې سپارښتنې به په ټاکلي وخت عملي کوي. همدارنګه یې د وزارت له رهبرۍ څخه د تخنیکي همکارۍ غوښتنه وکړه.
د تخنیکي پلټنې رئیس زیاته کړه چې د افغانستان اسلامي امارت د پانګوالو د ستونزو په حل کې جدي دی. سربېره پر دې د تخنیکي پلټنې رئیس ټینګار وکړ، چې د هېواد د طبیعي زېرمو د معیاري، قانوني او شفاف استخراج لپاره به خپلې پلټنې دوامدارې وساتي او د یادو شرکتونو د فعالیتونو د سمون او پرمختګ څارنه به کوي.
