د اندخوی مالګې کان د نښلوونکي سړک رغنیزې چارې پیل شوې
د فاریاب ولایت اندخوی مالګې کان ته د غځېدلي سړک، چې ١٤.٢ کیلومټره مساحت لري د رغنیزو چارو د پرانیستې مراسمو کې د فاریاب والي عبدالاحد افضلي، د کانونو او پټرولیم وزارت پلاوي، د ابوسعید کان کیندنې شرکت رئیس سید محمد کریم هاشمي، سیمه ییزو مخورو او د رسنیو استازو په شتون کې یې چارې د ١٤٠٤ لمریز کال د سلواغې میاشتې په ١٥مه نېټه پیل شوې.
د غونډې په پیل کې د فاریاب ولایت والي په خپلو خبرو کې پانګوالو ته د اسانتیاوو رامنځته کولو او د کان کیندنې شرکتونو ته د هر راز قانوني همکاري ډاډ ورکړ.
ورپسې د کانونو او پټرولیم وزارت سلاکار مولوي مطیع الله حقاني د اندخوی مالګې کان د ملک له سترو کانونو څخه یاد کړ او دغه راز یې د یاد سړک د رغولو په اړه خوښي څرګنده کړه نوموړي وویل چې په یاد کان کې به ګڼ شمېر وګړو ته کاري فرصتونه برابر شي سربېره پر دې به د شرکت له لوري په ملک کې د مالګې معیاري کارخونه جوړه شي.
په پای کې د ابو سعید شرکت استازي د تړون اړوند ټولو ژمنو د عملي کېدو او له ١٥٠٠ څخه زیاتو کسانو ته په مستقیم او غیر مستقیم ډول د کاري زمینې برابرولو خبره وکړه.
