د کابل پولي تخنیک پوهنتون محصلینو د عملي دورې پای
د کانونو انسټیټوټ ریاست ته د کابل پولي تخنیک پوهنتون د ځمکې لاندې کان کیندنې څانګې ۳۱ تنه محصلین د زده کړو د عملي دورې ترسره کولو په موخه د ۱۴۰۴ کال د زمري له ۲۰مې څخه تر ۲۷مې نېټې پورې د اتو ورځو لپاره معرفي شوي وو، د یاد پروګرام اړوند یې د ودانیزو موادو د ماشینري پېژندل، د ودانیزو موادو غلبېل، پرې کول، روښانه او صفا کول په عملي ډول ورته تدریس شول.
همدارنګه محصلینو د مرمرو، سینګاري ډبرو د کیندنې له سیمو څخه چې د سیم پرې کولو له لارې اېستل کېږي لیدنه وکړه. هغوی د روزنې تعلیمي مرکز کې عمودي او افقي صوفونو د Room & Pillar له لارې د صوفونو کیندنې څخه د لیدنې سربېره ورته د تیودولیت، کمپاس او نورو توکو څخه د ګټې اخیستنې په اړه د انجنیرانو لخوا لنډ معلومات ورکړل شول او همدا راز یې د لوګر ولایت د عینک د مسو له کان څخه هم لیدنه وکړه.
د یادې عملي دورې په پای کې د کانونو انسټیټوټ رئیس له لوري محصلینو ته تصدیق پاڼې ورکړل شوې او هغوی ته یې په چارو کې د بریالیتوب هیله وکړه.
د کابل پولي تخنیک پوهنتون استاد پوهنیار عزیزالله اتمانخېل د دې عملي دورې د جوړولو له امله د وزارت له مشرتابه او د کانونو انسټیټوټ له رئیس څخه مننه وکړه.
