د امریکا او انګلستان RDS شرکت له استازي سره د وزارت د سرپرست لیدنه
د کانونو او پټرولیم وزارت سرپرست شیخ الحدیث شهاب الدین دلاور د امریکايي او انګلستاني RDS شرکت له استازي سره په خپل کاري دفتر کې ولیدل.
په دغه لیدنه کې دواړو لورو په افغانستان کې د پانګونې لپاره د مناسبو شرایطو په ځانګړې توګه د افغانستان د کانونو په برخه کې د پانګونې او د بهرنیو پانګوالو د هڅونې او جذب په اړه خبرې وکړې.
د ياد شرکت استازي د کانونو او پټروليم وزارت له ميلمه پالنې څخه د مننې تر څنګ د افغانستان په کانونو کې يې د پانګونې غوښتنه وکړه، چې د کانونو او پټروليم وزارت سرپرست د کان کېندنې د قوانیونو او مقرراتو له مخې د لازمې همکارۍ ژمنه وکړه.
