د کانونو او پټرولیم وزارت سرپرست په بهرنیو هېوادونو کې مېشت افغان سوداګرو او پانګوالو سره ولیدل
د کانونو او پټرولیم وزارت سرپرست شیخ الحدیث شهاب الدین دلاور نن چهارشنبه د 28/4/1402 نېټه په هالنډ او لندن کې مېشت افغان سوداګرو سره په خپل کاري دفتر کې ولیدل.
په دغه لیدنه کې په بهرنیو هیوادونو کې مېشت افغان سوداګرو د هېواد په اقتصادي پراختیا، خلکو ته د کار زمینې برابرولو او وطن ته د خدمت کولو په اړه خبرې وکړې. او همدارنګه یې وغوښتل چې په هیواد کې د کانونو د تجزې او تصفې لپاره کارخونه جوړه کړي.
د کانونو او پټرولیم وزارت سرپرست وویل: د اقتصادي پراختیا په برخه کې د سوداګرو او پانګوالو ونډه ارزښتناکه او د اهمیت وړ ده. او دا چې په ټول هېواد کې سرتاسري امنیت تأمین دی له ټولو کورنیو او بهرنیو پانګوالوته د افغانستان په کانونو باندې د پانګونې لپاره ښه راغلاست وایم. او د کانونو د تصفیې کار خونې جوړولو کې یې د هر ډول همکاري ډاډ ورکړ.
