د کانونو او پټرولیم وزارت د ولایتونو ریسانو ته د روزنیز پروګرام جوړول

نن یکشنبه د 8/8/1401 نېټې د کانونو او پټرولیم وزارت د کنفرانسونو په تالار کې د ولایتونو د کانونو رئیسانو لپاره پنځه ورځنی روزنیز پروګرام د یاد وزارت سرپرست وزیر شېخ الحدیث شهاب الدین دلاور، د تخنیکي مرستیال انحنیر وحید الله حلیمي، د مالي او اداري مرستیال مولوي حسام الدین صابري، د جیولوجي سروې مرستیال انجنیر نورالله ستانکزی او د بشري سرچینو رئیس مولوي احمد ضیاء خاکسار په ګډون تر سره شو.
په پېل کې د کانونو او پټرولیم وزارت سرپرست شېخ الحدیث شهاب الدین دلاور رئیسانو او مېلمنو ته د ښه راغلاست تر څنګ وویل د افغانستان کانونه یو الهي امانت او بیت المال ده او دا زموږ هر یو دنده ده چې د دې امانت ساتنه په صادقانه توګه وکړو او زما هیله همدا ده چې تاسو د کانونو قانوني مراحل د قانون په رڼا او په پوره ایماندارۍ سره وڅارئ.
شېخ صاحب زیاته کړه چې یاد پروګرام یو ښوونیز پروګرام دی چې د وزارت ټولې کاري څانګې پکې شاملې دي. او هڅه وکړئ چې له دې فرصت څخه په ښه توګه ګټه پورته کړئ تر څو په ټولو کاري برخو کې په پوره اخلاص ترې ګټه واخلئ او په پلي کولو کې یې کوښښ وکړئ. 
د دغه پنځه ورځني پروګرام په لومړۍ ورځ د پلان او راپور ورکولو رئیس ښاغلي حارث برومند له لوري د پلان جوړونې او راپور ورکولو پرزنتیشن وړاندې کړ. ورپسې به بیا د قوانینو او مقرارتو، د عوایدو، مالي او حسابي، کادستر او د کانونو د قرارداد او د جیولوجي سروې په برخو کې د اړوندو رئیسانو له لوري د ولایتونو د کانونو رئیسانو ته معلومات وړاندې شي.