محمد هارون چخانسوري: موږ د افغانستان د استخراجي صنایعو د روڼتیا نوښت په سازمان کې د ښځو مساوي ونډې ته ژمن یو
د کانونو او پټرولیم وزیر محمد هارون چخانسوري د استخراجي صنایعو د روڼتیا نوښت د نړیوال سازمان په غونډه کې چې د ویډیو کنفرانس له لارې ترسره شوه، ګډون وکړ.
په دې غونډه کې د استخراجي صنایعو د نوښت نړیوال سازمان اجراييه رئیس، د نوي زيلانډ پخوانۍ صدراعظمې، د ۵۲ غړو هېوادونو استازو او د بېلابېلو نهادونو او د نړیوالو ادارو ۴۵۰ غړو ګډون درلود.
له دې غونډې څخه موخه دا وه چې څرنګه کولای شو د استخراجي صنایعو د روڼتیا نوښت د سازمان په پروسه کې د ښځو ونډې ته وده ورکړو.
د کانونو او پټرولیم وزیر محمد هارون چخانسوري په خپله وینا کې وویل: موږ د افغانستان د استخراجي صنایعو د روڼتیا نوښت په سازمان کې د ښځو مساوي ونډې ته ژمن یو او د افغانستان د استخراجي صنایعو د سکتور په کلیدي بستونو کې د ښځو ګډون ته اغېزناکه زمینه مساعدوو.
محمد هارون چخانسوري زیاته کړه: یو کال مخکې د افغانستان د استخراجي صنایعو د روڼتیا نوښت په سازمان او په څو اړخیز ګروپ کې هېڅ ښځې غړیتوب نه درلود. حال دا چې اوس په ګروپ کې څلور تنه ښځې چې د خصوصي سکتور مدني ټولنې استازولي کوي، لرو. سربېره پردې په نوي کاري پلان کې هم داسې فعالیتونه ځای پر ځای شوي چې د ښځو د ونډې د پراختیا په برخه کې اغېزناک ثابت کیږي.
د غونډې په ترڅ کې د مختلفو هېوادونو څخه د نړیوالو ادارو استازو هم د استخراجي صنایعو په برنامو کې یې د ښځو د ودې پر اهمیت خبرې وکړې.
