د جوزجان ولایت په یتیم تاق سیمه کې د طبیعي ګازو د 36 نمبر څاه د کیندنې کارونه په بریالیتوب سره بشپړ شول، او د استخراج لپاره چمتو شو
دا د کانونو او پټرولیم وزارت تر مدیریت لاندې د ګازو د څاه دویمه کیندنه ده، چې نږدې 40 کاله وروسته په هېواد کې په بریالیتوب سره ترسره شوه. د دغه څاه ژوروالی1600 متره دی، چې د استخراج شوي ګاز څخه به یې د بیات پاور او غضنفر ګروپ د برېښنا د انرژۍ د تولیدي دستګاوو، د مزارشریف د کود او برېښنا د فابریکو او نورو مصرف کونکو اړتیاوې پوره شي.
لدې مخکې د روان کال په پیل کې، په همدې سیمه کې د طبیعي ګازو د استخراج د A32 نمبر څاه کارونه په بریالیتوب سره بشپړ شول او ګټه اخیستنې ته وړاندې شو.
ددې دوه څاګانو د طبیعي ګازو له استخراج سره به په څلورویشت ساعتونو کې د افغان ګاز تولیدي ظرفیت شاوخوا 300 زره متر مکعب ته لوړ شي، چې په پایله کې به یې پر پانګوالو د ګازو د خرڅلاو څخه د دولت په کلنیو عوایدو کې شاوخوا 8 میلیونه ډالر اضافه والۍ راشي.
د یادونې وړ ده، چې د یادو دوه څاګانو د کیندنې د تخنیکي، فني او امنیتي برخو په پلي کولو کې شاوخوا 250 کسانو ته په مستقیم ډول د کار زمینه مساعده شوې وه.
