په کونړ ولایت کې د کانونو خامو موادو وزن کولو لپاره د برېښنايي تلې چارې بشپړې شوې
د کانونو او پټرولیم وزارت له خوا د کونړ ولایت په نورګل ولسوالۍ کې د کاني موادو باروړونکو موټرو د وزن کولو په موخه د پنځه میلیونه افغانیو په ارزښت د برېښنایي تلې او ودانۍ جوړېدو چارې بشپړې او ګټې اخیستنې ته وسپارل شوې.
په دغه مراسیمو کې چې د کونړ ولایت د کانونو رئیس مولوي محمد شیرین حقاني او یو شمېر ځایي مسوولینو برخه اخیستې وه، د یادې پروژې بشپړېدل یې د عوایدو لوړوالي په برخه کې مهم وبلل او د ورته نورو پروژو په تطبیق یې ټینګار وکړ.
د کونړ ولایت د کانونو رئیس وویل: کونړ پراخ معدني زیرمې لري، چې له جملې یې د نورګل ولسوالۍ مرمرو کان په ګډون یو شمېر کانونه په قرارداد ورکړل شوي، چې د دغې تلې په جوړېدو سره به د استخراج شویو مرمرو، نیمه قېمتي ډبرو او نورو کاني موادو د وزن کولو ستونزې حل شي او د ا.ا عوایدو لوړوالي کې به مرسته وکړي.
