په کابل ښارکې د قیمتي او نیمه قیمتي ډبرو پروسس مرکز جوړولو په موخه غونډه ترسره شوه

د کانونو او پټرولیم وزارت سرپرست الحاج ملا هدایت الله بدري د یکشنبې په ورځ د 1403/8/20 نېټې د اقتصاد وزارت له سرپرست قاري دین محمد حنیف، د کابل ښاروال مولوي عبدالرشید بلوچ، د ماليې وزارت د پلان او پالیسۍ مرستیال انجنیر سلطان محمد زبیر، د اقتصادي معاونیت مالي رئیس حافظ محمد سره په کابل ښار کې د قیمتي او نیمه قیمتي ډبرو پروسس مرکز جوړولو طرحې په اړه په خپل کاري دفتر کې غونډه ترسره کړه.

په دغه غونډه کې یې په کابل ښار کې د قیمتي او نیمه قیمتي ډبرو د پروسس مرکز جوړولو، بهرنیو هېوادونو ته دیادو ډبرو لېږد، د کان کیندنې اجازه لیکونو صادرولو، د قیمتي او نیمه قیمتي ډبرو د خرڅلاو مرکزجوړولو، بازار موندنې، مرکز ته د ډبرو را لېږد، د قیمتي ډبرو د ارزښت او عوایدو په اړه یې هر اړخیز بحثونه او نظرونه شریک کړل.

د کانونو او پټرولیم وزارت مېلمنو ته د ښه راغلاست تر څنګ د هېواد د کاني زېرمو په ځانګړې توګه د قیمتي او نیمه قیمتي ډبرو د ارزښت په اړه خبرې وکړې ویې ویل: افغانستان د قیمتي او نیمه قیمتي ډبرو له پلوه بډایه هېواد دی، دغه راز یې په کابل ښار کې دیادو ډبرو د پروسس مرکز جوړول اړین ګام وباله او په دې برخه کې ورسره د هرډول قانوني همکاریو ژمنه وکړه.