مالي او اداري مرستیال له بهرنیو پانګوالو سره وکتل

د کانونو او پټرولیم وزارت مالي او اداري مرستیال الحاج مولوي حسام‌الدین صابري د ازبکستان او چین هېوادونو له پانګوالو سره وکتل.
یادو پانګوالو د افغانستان اسلامي امارت له لوري د پانګونې لپاره د مناسب چاپېریال د برابرولو او د سراسري امنیت د ټینګښت له امله مننه وکړه. همدارنګه یې د فلزي او غیرفلزي کانونو په برخه کې د پانګونې په موخه خپله لېوالتیا څرګنده کړه.
د کانونو او پټرولیم وزارت مالي او اداري مرستیال د کانونو په برخه کې د پانګونې په موخه د هغوی د لېوالتیا هرکلی وکړ او ډاډ یې ورکړ، چې د پانګونې لپاره د مناسب چاپېریال د رامنځته کولو سربېره به د کانونو د قانون او کړنلارې له مخې اړینې همکارۍ ترسره شي.