غزني ولایت ته د کانونو او پټرولیم وزارت د پلان او پالیسي مرستیال سفر
د کانونو او پټرولیم وزارت د پلان او پالیسي مرستیال شیخ ضیاءالرحمن الاریوبي وړمه ورځ غزني ولایت ته په یو رسمي سفر ولاړ.
په یاد سفر کې شیخ ضیاءالرحمن الاریوبي د غزني ولایت له والي الحاج مولوي رحیم الله محمودي، امنیه قومندان، د استخباراتو ریاست مرستیال، د کانونو رئیس او نورو اړوندو ادارو رئیسانو سره ولیدل.
د بېلابېلو موضوعاتو ترڅنګ یې د څارنې او ستونزو ته د رسېدو په موخه د کمېټې جوړېدو په ځانګړې توګه د غزني ولایت کاني زېرمو او له هغو څخه سمه ګټه اخیستل، د کانونو د غیري قانوني استخراج مخنیوي په اړه یې خبرې وکړې.
همدارنګه د کانونو او پټرولیم وزارت د پلان او پالیسي مرستیال له لوري د یاد ولایت د کانونو رئیس په مشرۍ یوه ګډه کمېټه چې پکې د غزني ولایت (امنیه قومنداني،استخبارات،کانونو ریاست،مستوفیت،اقتصاد، کرنه،چاپیریال ساتنې، سوداګري او صنعت) شامل دي جوړه کړه او زیاته یې کړه: دغه کمېټه د کانونو د غیرقانوني استخراج، قاچاق مخنیوی او د کانونو د استخراج په برخه کې د چټکتیا په موخه جوړه شوه او غوښتنه یې وکړې چې سیمه یز ارګانونو دې له یادې کمېټې سره همکاري وکړي، ټولو اړوندو ادارو ورسره د همکاریو ژمنه وکړه.
