د کانونو پټرولیم وزارت سرپرست وزیر د پاکستان د ملي امنیت سلاکار معید یوسف سره ولیدل.
د کانونو او پټرولیم وزارت سرپرست وزیر شېخ الحدیث شهاب الدین دلاور د پاکستان د ملي امنیت سلاکار معید یوسف، مل پلاوی او یو شمېر پاکستاني پانګوالو سره په خپل کاري دفتر کې وکتل.
په دغه لیدنه کې د افغانستان اسلامي امارات د کانونو او پټرولیم وزارت سرپرست شیخ الحدیث شهاب الدین دلاور د دواړو هېوادونو ترمنځ د اړیکو او ښه ګاونډیتوب د هرکلي په ترڅ کې وویل افغانستان له خپلو ګاونډیانو سره اوږدمهاله ښې او دوستانه اړیکې لري. موږ خوښ یو چې له ۴۳ کلنې جګړې وروسته نن په ټول افغانستان کې ملي او اسلامي نظام حاکم دی او د خدای شکر دی چې هېوادوال مو له ځانګړي امنیت څخه برخمن دي.
ورپسې د پاکستان د ملي امنیت سلاکار معید یوسف او ورسره مل پلاوي د کانونو او پټرولیم وزارت له مېلمه پالنې مننه وکړه او د دواړو هېوادونو ترمنځ یې د نېکو اړیکو د لا پیاوړتیا غوښتنه وکړه او وویل: موږ ډېره لېوالتیا لرو چې په افغانستان کې پانګونه وکړو او همدارنګه د ډبرو سکرو او تالک د لېږد په اړه هم خبرې وکړې او د دواړو هېوادونو له خوا د همکاریو ژمنې وشوې.
